O grombil y Mabinogi, dyma ail-ddychmygiad cyfoes o chwedl Arianrhod.
Bydd trioleg OLION yn brofiad unigryw ar ffurf sioe theatr, digwyddiad diwrnod o hyd ar strydoedd Bangor, a ffilm fer.
Ymunwch â ni ym mis Medi ar daith o ddyfnderoedd y môr i brofi uchelfannau rhyddid.
Rhan I: Arianrhod
Sioe theatr fyw sy’n ddehongliad newydd o stori boddi Caer Arianrhod.
Mae’r gaer yn fwrlwm o ryw a hedonistiaeth ysbrydol ac mae Arianrhod a’i ffrinidau agos - sydd wedi dianc o ryfel cartref - yn paratoi am eclips solar sy’n gaddo gwawr newydd. Ond mewn moment o dywyllwch wrth i’r lleuad orchuddio’r haul, maen nhw’n wynebu brad a thrais anesboniadwy.
Wrth i Arianrhod barhau i wrthsefyll pwysau gan ei theulu, mae hi’n ysgogi storm oruwchnaturiol sy’n suddo Caer Arianrhod i waelod y môr.
Miloedd o flynyddoedd yn ddiweddarach, ac mae disgynyddion Arianrhod yn dal i fyw mewn ofn ar wely’r cefnfor. Ond a fyddan nhw’n cael eu temtio i adael eu cartref er mwyn profi’r tir uwchben drosynt eu hunain?
Yn llawn dawns a cherddoriaeth, dyma gynhyrchiad theatr pwerus am un noson dyngedfennol sy’n atseinio drwy’r canrifoedd.
Rhan II: Gŵyl yr Isfyd
Cerddoriaeth fyw, bwyd a dawnsio, wrth i ni droi un o barciau Bangor yn ŵyl gymunedol, awyr-agored rhad ac am ddim.
Wrth i fwrlwm yr ŵyl fagu stêm, mae disgynyddion Arianrhod yn ymddangos o’r môr. A fydd croeso iddynt, neu a oedden nhw’n iawn i boeni am bobl y tir sych wedi’r cwbl?
Bydd golygfeydd yn ymddangos ar hyd Bangor drwy gydol y dydd gyda gwrthdaro ac achubiaeth ddramatig yn trawsnewid yr ŵyl yn ddathliad o amrywiaeth, goddefgarwch a llawenydd.
Rhan III: Y Fam
Yr epilog.
Ffilm fer sy’n cyfuno deunydd o ran I a II wrth i ni ddilyn stori teulu cyffredin o Fangor.
Ond beth sy’n digwydd pan fydd siwrne seicedelig yn trawsnewid Hirael i mewn i fyd ffantasi Caer Arianrhod?
Tocynnau
Bydd tocynnau ar werth ym mis Mehefin 2024.
Mewn cydweithrediad â Pontio, Bangor gyda chefnogaeth Storiel.
Mae Frân Wen yn derbyn cyllid craidd gan Gyngor Celfyddydau Cymru i gefnogi ei raglen.
Mae Olion, sy'n rhaglen 15 mis o weithgareddau hefyd yn cael ei gefnogi gan Gyngor Gwynedd. Mae’r prosiect wedi derbyn £252,911 gan Lywodraeth y DU drwy Gronfa Ffyniant Gyffredin y DU.
