Yn teithio ochr yn ochr â’n cynhyrchiad diweddaraf, Dynolwaith, bydd gan gynulleidfaoedd y cyfle i brofi arddangosfa eithriadol gan yr artist o Ogledd Cymru, Reece Moss Owen, sy’n dathlu hunaniaeth, actifiaeth a lleisiau cymunedol. Bydd yr arddangosfa i’w gweld ym mhob lleoliad ar y daith - ac rydym yn eich gwahodd i gymryd rhan.

Am yr Artist

Mae Reece yn artist anneuaidd (non-binary) sy’n gweithio ar draws amrywiaeth o gyfryngau, ond sydd fwyaf hoff o fywiogrwydd a symlrwydd pensiliau ffelt lliw. Maen nhw'n creu celf er mwyn ennyn syniadau ac emosiynau gyda’r nod o ysgogi sgwrs a llawenydd.

“Ond dwi hefyd yn meddwl bod hi'n bwysig dathlu llawenydd traws. O'r siacedi protest dwi wedi creu, dwi'n gobeithio bydd y gynulleidfa yn teimlo amrywiaeth o emosiynau - o dristwch y bygythiad i hawliau traws, i'r gobaith a llawenydd wrth glywed nifer o leisiau a fu’n cydweithio ar y prosiect hwn."

Mae'r arddangosfa wedi bod yn bosibl diolch i gydweithio â:

• Clwb LHDTC+ GISDA
• Rhwydwaith Traws Rhyngryw ac Anneuaidd Gogledd Cymru (TINN)
• The Queer Emporium
• Coleg Caerdydd a’r Fro

The Protest Jacket Project

Ysbrydolwyd y syniad hwn gan un o linellau yn un o ddrafftiau cynnar Dynolwaith:

“... fod yn draws heddiw yw bod yn actifydd.”

Ysbrydolodd y geiriau hyn y syniad o siacedi protest - dillad sydd â hanes ym myd actifiaeth LHDTC+, o derfysgoedd Stonewall hyd at heddiw. Mae Reece wedi creu tair siaced unigryw ar gyfer y daith:

Siaced 1: Artist

Mynegiant personol o hunaniaeth Reece fel artist Cymreig, anneuaidd, a datganiad ar hawliau traws a hawliau dynol.

Siaced 2: Cynulleidfa

Siaced i chi. Mae’r ail siaced yn wahoddiad i gynulleidfaoedd ryngweithio ac ymateb i’r cwestiwn: “Sut dan ni’n rhannu’r baich?”

Cymerwch pen ffelt a rhannwch eich ateb naill ai’n uniongyrchol ar y siaced neu ar ddarn o ffabrig a’i binio arno.

Siaced 3: Cymuned

Wedi’i chyd-greu gyda grwpiau lleol trwy weithdai gwneud bathodynnau protest, mae’r siaced hon yn dathlu lleisiau sy’n rhy aml yn ddi-lais.

Cymerwch Ran

Nid arddangosfa i’w gwylio’n unig yw hon - mae'n wahoddiad i gymryd rhan. Rydym yn annog pawb i ryngweithio, feddwl, ac ychwanegu eu llais. Boed drwy eiriau, lluniau neu fathodynnau, mae pob cyfraniad yn rhan o stori ehangach o wydnwch, protest a llawenydd.

Dewch i weld y Prosiect Siaced Brotest wrth iddo deithio gyda Dynolwaith a byddwch yn rhan o’r drafodaeth.