Rydym wrth ein bodd yn cyhoeddi bod Nyth, ein cartref newydd, wedi coroni blwyddyn arbennig drwy ennill Medal Aur Nora Dunphy am Bensaernïaeth yn yr Eisteddfod Genedlaethol eleni.

Takuya Oura a Hedydd Ioan (aelod bwrdd Frân Wen) yn derbyn y wobr
................

Mae’r gydnabyddiaeth ddiweddaraf yn dilyn llwyddiant Nyth yn gynharach yn y flwyddyn yn ennill Gwobr MacEwen gan Sefydliad Brenhinol Penseiri Prydain (RIBA), sy'n dathlu pensaernïaeth er lles y cyhoedd.

Bu hefyd llwyddiant ysgubol i’r adeilad yng ngwobrau Cymdeithas Frenhinol Penseiri yng Nghymru yn ddiweddarach pan enillodd Nyth y gwobrau canlynol:

• Adeilad Pensaernïaeth Cymru 2025

• Gwobr Pensaernïaeth Cymru 2025

• Cleient Pensaernïaeth Cymru 2025

• Gwobr Cynaliadwyedd Pensaernïaeth Cymru 2025

• Gwobr Dewi-Prys Thomas 2025

Rhoddwyd canmoliaeth uchel i drawsnewidiad yr hen eglwys Santes Fair ym Mangor dan

arweiniad y pensaer Takuya Oura o gwmni pensaernïol Manalo & White.

“Tarodd y pensaer gydbwysedd trwy ymateb yn hyderus i’r brîff gydag ymyriad sydd ddim yn cystadlu â phensaernïaeth wreiddiol yr eglwys,” meddai Mike Worthington, beirniad Gwobr MacEwen.

Y pensaer Takuya Oura
................

Mae’r cydnabyddiaeth yn tynnu sylw at effaith y prosiect fel adeilad diwylliannol a phensaernïol o bwys.

“Mae Nyth wedi creu argraff fawr ar artistiaid, pobl ifanc a’r gymuned ers agor ei ddrysau yn 2024 ac wedi llwyddo i fynd y tu hwnt i’r disgwyliadau fel gofod gwirioneddol gynhwysol sy’n annog arloesedd creadigol a phrosesau cydweithredol cyffrous,” meddai Nia Jones o Frân Wen.

“Yn ei flwyddyn gyntaf yn unig mae 15,916 wedi camu drwy’r drysau sy’n wych – ac mae'n brawf o'r angen am ganolfan creadigol o’r math yng Ngogledd Orllewin Cymru.”

Dywedodd Takuya Oura: “Roedd dylunio’r prosiect yn heriol, gan fod yn rhaid i ni gyrraedd anghenion Frân Wen a’u dymuniad am adeilad a oedd yn hygyrch i bawb.

“Ond cafodd yr heriau hynny eu hateb a’u datrys, ac rydym yn hynod hapus gyda’r gwaith gorffenedig ac yn falch iawn o dderbyn yr anrhydedd hon yn yr Eisteddfod Genedlaethol.”

Adeiladu set Olion yn y Stiwdio
................