Carreg Ateb: Vision or Dream?

Prosiect celf uchelgeisiol gan bobl ifanc Gogledd Cymru mewn cydweithrediad ag artistiaid rhyngwladol o fri

Fel rhan o ddathliadau deucanmlwyddiant yr Oriel Genedlaethol, mae Frân Wen yn cydweithio gydag oriel Mostyn yn Llandudno a’r artist celf cyhoeddus blaenllaw Jeremy Deller i gyflwyno Carreg Ateb: Vision or Dream? – prosiect uchelgeisiol sy’n rhoi llwyfan i leisiau newydd wrth ail-ddychmygu’r berthynas rhwng hanes, hunaniaeth a dychymyg creadigol.

Wedi’i ysbrydoli gan hanes y trysorau cenedlaethol a gafodd eu cuddio yn chwareli llechi Manod yn ystod yr Ail Ryfel Byd, mae’r prosiect yn cynnig cyfle i bobl ifanc hawlio eu lle o fewn stori ddiwylliannol Cymru – nid drwy lens rhamantaidd, ond drwy ddull beiddgar sy’n archwilio trawsnewid, mynegiant personol a’r dyheadau ar gyfer yfory.

Cydweithio gydag artistiaid blaenllaw

Mae Cwmni Ifanc Frân Wen yn cydweithio â rhai o artistiaid mwyaf blaenllaw Cymru, gan gynnwys:

• Gethin Evans (cyfarwyddwr)
• Edie Morris (cynllunydd gweledol)
• Sam Jones (cynllunydd sain a chyfansoddwr)
• Klaire Tanner (artist digidol)
• Llŷr Evans (ffotograffydd)
• Elan Isaac a Harrison Claxton (coreograffwyr)

Yn ymuno â’r bobl ifanc ar lwyfan ac ar y daith mae dawnswyr proffesiynol:

• Eli Williams
• Tom Kemp
• Kseniia Fedorovykh
• Krystal Lowe

Troi'r tirwedd yn lwyfan byw

Bydd y prosiect yn cychwyn gyda gorymdaith gerddorol a choreograffig rymus o chwareli Eryri i Landudno, gan droi’r tirwedd yn lwyfan byw ar gyfer straeon dyfeisgar a chreadigol. Yna bydd y perfformiad yn llifo i mewn i Oriel Mostyn, gan agor arddangosfa haf newydd, wedi’i chyd-guradu gyda Jeremy Deller, sy’n cynnwys comisiynau gan bum artist cyfoes o Gymru sef Esyllt Angharad Lewis, Gweni Llwyd, Lewis Prosser, Llŷr Evans a Sadia Pineda Hameed.

Bydd eu gwaith yn cael ei gyflwyno ochr yn ochr â detholiad o weithiau o gasgliadau Amgueddfa Genedlaethol Cymru, Amgueddfa Llandudno a Storiel yn ogystal â gwaith gan Jeremy Deller ei hun - gan greu deialog gyfoethog rhwng y gorffennol, y presennol a’r hyn sydd eto i ddod.

Y tu hwnt i'r llwyfan

Y tu hwnt i’r prif berfformiadau, bydd Carreg Ateb yn tanio cyfres o ymyriadau artistig annisgwyl ar draws Gogledd Cymru, ynghyd â chynnwys digidol arloesol ar ffurf ffilmiau byrion wedi’u saethu ar leoliad yn chwareli dramatig Eryri – gan uno’r byd ffisegol a’r digidol mewn dull beiddgar a thechnolegol.

Mae Jeremy Deller – enillydd Gwobr Turner ac arloeswr ym maes celf gyhoeddus – yn adnabyddus am ei waith trawiadol fel The Battle of Orgreave a We’re Here Because We’re Here, ac yn arbenigo mewn creu profiadau sy’n chwalu’r ffiniau rhwng celf a chymuned.

Mae Carreg Ateb: Vision or Dream? yn rhan o The Triumph of Art – cyfres genedlaethol o ddigwyddiadau celf gyhoeddus sy’n cael eu cynnal yn Dundee, Plymouth a Derry-Londonderry, ac sy’n dod i ben gyda diweddglo mawreddog yn Sgwâr Trafalgar, Llundain ar 26 Gorffennaf 2025.

Ymunwch â ni i brofi’r gorffennol wedi’i ail-ddychmygu gan genhedlaeth newydd – a chael cipolwg ar y dyfodol maen nhw ar fin ei greu, un cam annisgwyl ar y tro.